• በመድን ሥራ አዋጅ ቁጥር 746/2004 አንቀጽ 2(19): "የመድን ደላላ" ማለት ኮሚሽን በማስከፈል በመድን ገቢው ሰው ስም የመድን ውል ለመዋዋል የሚያስችሉ ቅድመ ዝግጅቶችን የሚያመቻች፤ የመድን ውል ቀጣይ አስተዳደርና እድሳትን በሚመለከት እገዛ የሚያደርግ፤ እንዲሁም በመድን ውለታና በካሳ ክፍያ ጥያቄ ላይ ለመድን ገቢው የማማከር አገልግሎት የሚሰጥ ነው።
• የተሻረው የመድን ስራ ስለመፍቀድና ስለመቆጣጠር የወጣው አዋጅ ቁጥር 86/1986 አንቀጽ 2(11): የ"መድን ደላላ" ትርጓሜ ይዘት ከአዋጅ ቁጥር 746/2004 ጋር ተመሳሳይ ነው።
• በንግድ ሕጉ ስለደላሎች ትርጓሜ በሚሰጠው አንቀጽ 56(1): "ደላላ" ማለት ውል የሚዋዋሉ ሰዎችን (እንደ ሽያጭ፣ ኪራይ፣ ኢንሹራንስ፣ የማመላለሻ ውል) ፈልገው የሚያገናኙና የሚያዋውሉ፣ ራሱን የቻለ የሞያ ተግባራቸው አድርገው ጥቅም ለማግኘት የሚሰሩ ሰዎች ወይም ይህንኑ የደላልነት ሥራ የሚሰራ የንግድ ማህበር ነው።

እነዚህ ሕጎች እንደሚያሳዩት የመድን ደላላው ሚና ደንበኛን ከመድን ሰጪ ጋር ከማገናኘት ባሻገር፣ የውል ድርድርን፣ ቀጣይነትን፣ እድሳትን እና የካሳ ጥያቄዎችን ጭምር የሚያካትት ዘላቂ አገልግሎት ነው።